चांदण्यांनो ...

चांदण्यांनो .....
१.
लुकलुकणाऱ्या चांदण्यांनो या अंगणी
साजरी होते आहे आज येथे दिवाळी
प्रकाशित होवू दे जीवन हे सर्वांचे
नको किंचितही ती  छाया अंधारी काळी
२.
लुकलुकणाऱ्या चांदण्यांनो या अंगणी
रात्र आज वेगळी आनंद माझ्या मनी!
आरास करा सजवा सारा आसमंत
भेटणार प्रियतमा लाजरी साजणी !
३.
 लुकलुकणाऱ्या चांदण्यांनो या अंगणी
अंधार सारा हटू द्या माझ्या घरातुनी!
दाटेल उत्साह उजळता आसमंत
आशेचा धुमारा उठे मना मनातुनी!
४.
लुकलुकणाऱ्या चांदण्यांनो या अंगणी
काव्य विनोदात रात्र ही जागवू सारी
महफिल रंगू दे खळाळत्या हास्याने
स्वागतार्थ  ही  रांगोळी रेखाटली दारी
 ५.
लुकलुकणाऱ्या चांदण्यांनो या अंगणी
भेटीस तुमच्या अधीर एक  चांदणी!
चंद्राच्या साक्षीने वाट पाहते कधीची
दुसरी तिसरी ना असे माझी साजणी!  
 ६.
 लुकलुकणाऱ्या चांदण्यांनो या अंगणी
 सजते आसमंत धवल प्रकाश मंद!
 रातकिडे सुरात गातात किर्रगीत
 जागवितो रात्र आळवित मी मुक्तछंद!
            ..... प्रल्हाद दुधाळ .